venres

et caetera

“true forget-me-nots Myosotis scorpioides” by Paul Sherman is licensed under CC BY 2.0

ás armas, meu rei
aos meus brazos
pégate a min
non vaiamos á guerra
que chamen por nós
canto queiran
non caeremos
no esquecemento
ao que nos destinan
-
un porto sen mar
onde non corre o sangue
e se fala lingua estranxeira
son as túas mans as que me atraen
imán de saudades
do corpo flaco
baleiro
que rompe
estamos aquí, agora, sen nos mirar aos ollos
negando a necesidade, a nosa
-
silencio
son as ruínas arqueolóxicas
do recordo cando xa pasou un tempo
cruzamos a fronteira do que se fala e do que non
e as colonias se independizaron
o día que firmamos o tratado de paz
e fixemos as maletas
(máis metáfora que realidade)
 para vir a este punto
-
que nos chaman á guerra
meu rei
nos reclama a patria
do tempo feliz


mércores

Resumo de lecturas

Lecturas finalizadas xaneiro - xuño 2017
Comezamos o ano con dúas lecturas pendentes, Las Luminarias, de Eleanor Catton, e Morgana en Esmelle, de Begoña Caamaño. Foi un semestre de moita poesía e moitas mulleres escritoras e protagonistas. Se tivese que recomendar moito moitísimo algunha destas lecturas, a golpe de corazón, vaian por diante os poemarios de María do Cebreiro, os relatos de Lucia Berlin, as memorias de Françoise Hardy e o ensaio de Kate Bolick.
  • Las luminarias, de Eleanor Catton (Siruela, 2014).
  • Morgana en Esmelle, de Begoña Caamaño (Galaxia, 2012).
  • Os hemisferios, de María do Cebreiro (Galaxia, 2006).
  • Os inocentes, de María do Cebreiro (Galaxia, 2014).
  • Carne de Leviatán, de Chus Pato (Galaxia, 2013).
  • Un lector llamado Federico García Lorca, de Luis García Montero (Taurus, 2016).
  • Palabra sobre palabra, de Ángel González (Seix Barral, 2008).
  • Partir, de Lucía Baskaran (Expediciones Polares, 2016).
  • ¿Oyes, pájaro?, de John Ashbery (Cátedra, 1999).
  • Últimos poemas, de Rabindranath Tagore (Visor, 2008).
  • Manual para mujeres de la limpieza, de Lucia Berlin (Alfaguara, 2016).
  • La desesperación de los simios... y otras bagatelas, de Françoise Hardy (Expediciones Polares, 2017).
  • Querida Ijeawele. Cómo educar en el feminismo, de Chimamanda Ngozi Adichie (Mondadori, 2017).
  • Punto cero: 1953-1976 (Obra poética #1), de José Ángel Valente (Alianza, 2007).
  • Mamá, quiero ser feminista, de Carmen G. de la Cueva (Lumen, 2016).
  • Las cosas del querer, de Flavita Banana (Lumen, 2017).
  • Solterona, de Kate Bolick (Malpaso, 2016).
  • Elegía, de Mary Jo Bang (Bartleby, 2010).
  • Quién quiere ser madre, de Silvia Nanclares (Alfaguara, 2017).
  • Material memoria : 1977-1992 (Obra poética, #2), de José Ángel Valente (Alianza, 2007).

martes

_ baila baila baila _

Ti sabes como vai isto
ser finxidora
bailar entre rúas
e berrar o seu nome no medio da noite


Non pido rescate
só unha man forte á que agarrarme
cando afogue no mar de cemento
e nos cubra a dúbida

Ataque de pánico en plena Gran Vía
Quitei os zapatos e volvín á casa
menos libre e máis cosida a ti
Non son estas as cervexas que mollaron as miserias
non son así

Di que todo isto pasará e

que volveremos bailar nas festas do San Roque.

sábado

Toma de contacto


Penso, logo existo
Medito
Sobre o tempo e o esvaecemento da luz
Mentres comparo a relación
Calidade-prezo de toda
Unha sección de supermercado

***

Contacto
Fraxilidade
As folerpas que caen e se desfán na túa man
Cortocircuíto
Ou a falta de salitre na pel

***

Esta é a taza de café que está a punto de caer ao chan

 ***

 Camiño
Non hai parada
Non dá tempo
A amarrar o barco
Camiño
Sobre a auga

***

Estado de reflexión
Vestir os pantalóns e saír ao frío
Como quen ten a vida ordenada e disposta

xoves

::aMARe::

soñei calcetar contos co teu pelo negro
ao tempo que se pon o sol en touriñán
non hai luz nas casas
perigo, paradigma de ser
muller-faro
mollas as túas dedas na miña auga, 
auga fría, que esperta os nervios de calquera mariñeiro 
queres sobrevivir, home-océano, 
ti que sabes de estrelas, que reflexas a vida? 
ti tes ese poder, deixarte levar ou quedar cravado aos meus pés.

brúan as bughinas desde a terra. chaman por nós.
"A Carta",  Wilfred Lam.